Ur-urayen paylaeng ti kampo ni incumbent Vice Governor Eric “Tagel” Felipe ti naipila a kaso kontra kenkuana iti opisina ti Ombudsman.
Sigun kenkuana, nakasagana daytoy a mangsungbat iti aniaman a damag seknan iti naipila a kaso.
Idi nadamag nu mabalin a makaapektar ti nasao a pakaseknan iti panagtarayna iti kina-kongresista, agtalek a saan daytoy a makaapektar.
Maipalagip a napilaan ti kaso a “graft” ken “corruption” ni Benguet Vice Gov. Ericson Felipe iti opisina ti Ombudsman babaen ti maysa a grupo.
Sigun iti Task Force Kasanag (TFK), mapapati nga adda ti conflict of interest ti panagbalin a bise gobernador ni Felipe ken kas maysa nga agtagikua ti Tagel Corporation, maysa a kompania nga addaan iti transakion iti gobierno.
Nakalanad iti nasao a reklamo a mapapati a nakaala ti tallo pulo a kontrata ti kompania ni Felipe iti Department of Public Works and Highways (DPWH) nga aggatada ti P1.35 bilyon idi tawen 2022 agingga 2023 bayat a bise gobernador paylaeng daytoy.
Patien ti nasao a grupo a nalawag a panaglabsing iti Republic Act 3019 ken 6713 wenno ti Anti-graft and Ethical Standards of a Government Official.
Innayon pay ti Task Force Kasanag a ni Felipe ket agtultuloy nga agtagikua iti 60% ti nasao a kompania nga aggatad ti P300 milion.
Iti naipila a kaso ti nasao a grupo kontra kenni Felipe, kinunada a mapapati nga inaramat ti bise gobernador ti puesto daytoy tapno makaala ti kontra iti DPWH.
Ti Task Force Kasanag ket maysa a civil society group a nakabase iti Cordillera Administrative Region (CAR) ken agbanbantay iti “katiwalian” dagiti opisial iti nasao a rehiyon.
