BAGUIO CITY– Agtultuloy ti panangisayangkat dagiti nagduduma nga yunit ti pulisya iti Cordillera Region iti kampanya kontra kadagiti iligal ken awanan lisensia nga armas.
Impannakkel ti Police Regional Office Cordillera a nagresulta ti nasao a kampanya iti umuna a bulan ti agdama a tawen iti panakaikustodiya ti pakabuklan a 84 a saan a rehistrado, iligal a naaramid wenno nabaliwan nga armas, 622 a nagduduma nga armas ken lima a granada.
Maibasar iti rekord, dagiti nasao nga armas ket resulta ti 46 a nagduduma nga operasyon kas iti panag-checkpoint, implementasyon ti search warrants ken panagrespondo iti naawat nga impormasyon a nagresulta pay iti panakakemmeg ti walo a tattao ken panakaipila ti innem a kaso iti korte.
Naamuan a 72 kadagiti loose firearms ti naisuko iti pulisya, 10 ti nakumpiskar ken dua ti narekober.
Pagyamyamanan pay ti pulisya ti suporta ti komunidad iti nairtengan a panangipatungpalda iti kampanya tapnu maisardeng ti panagadu dagiti iligal nga armas iti rehiyon Cordillera.
