La Trinidad, Benguet- Kidkiddawen ti maysa a concerned citizen ti dagos a panakaisimpa dagiti naka-uy-oy a wire nangruna idiay Puguis, La Trinidad, Benguet.
Kasaruno daytoy ti pannakasugat ti tenggedna bayat ti panagdalyasatna nu sadino nakalugan ti motor kaduana ti katuganganna paturong iti pagtrabahuan daytoy.
Iti exclusive interview ti Bombo Radyo Baguio kenni Angelo Paulo Padaoan, 24-anyos, kinunana nga alas 4:30 iti agsapa ita nga aldaw idi napasamak ti insidente.
Sigun kenkuana, paturongda idiay Bato, Longlong, Puguis, La Trinidad, Benguet idi saanda a nakita ti naka-uy-oy a wire a nangitunda iti pannakasugatna.
Iti baet ti kinaadda ti silaw iti nasao a lugar, saanda a naimatangan ti wire gaputa naingpis ken maris nangisit daytoy.
Dakkel met ti panagyaman ni Padaoan iti Namarsua gapu ta saan a napaspas ti panagdalyasatna ken saan a nauneg ti sugat.
Maipagarup a wire iti maysa a telepono wenno wireless fidelity (WiFi) ti naka-uy-oy a wire iti tengnga ti kalsada.
Gapu iti daytoy, kiddaw ni Padaoan iti maseknan nga opisina wenno kadagiti otoridad a dagus nga isimpada ti naka-uy-oy a wire.
Kabayatanna, dagos met nga insimpa ni Padaoan ti naka-uy-oy a wire a nangsugat ti tenggedna kalpasan nga intulodna ti katugannna.
