Inlawlawag ti Baguio City Police Station nga accidental fall ti rason iti ipupusay ti 45-anyos a janitorial leadman iti uneg ti SM mall iti siudad ti Baguio.
Immunan a nabigbig ti biktima a ni Robin Esguerra, empleyado iti nasao a mall.
Iti interview ti Bombo Radyo kenni PMaj. Wiltz Konrad Sally, Station Commander ti BCPO – Station 7, kinuna a pimmusay ti biktima kalpasan nga aksidente a natnag iti 20 meters ti kangatona iti elevator iti nasao a mall.
Dinakamatna a napasamak ti insidente idi Nobyembre 2, pasado alas tres ti malem ngem naitawag kadakuada pasado alas kwatro ti malem.
Sigun kenni PMaj. Sally, saan a nadlaw ti biktima nga awan ti elevator cart iti 3rd floor isu’t gapuna nga idi bimmaddek ket dimmeretso a natnag iti dua a kadsaaran wenno agarup 20 meters ti kangatuna.
Innayun met ti nasao nga opisyal nga awan ti makitkitada a foul play iti napasamak nga insidente.
Kabayatanna, impeksa met ti nasao a mall a nakikoordinardan iti pamilya ti biktiman ken kadagiti otoridad para iti imbestigasyon.
Iti agdama ket makikooordinar metten dagiti otoridad iti City Buildings and Architecture Office tapno masukimat ti nasao nga elevator ken maammuan no adda ti negligence a napasamak ken mairekomendar ti pannakasukat dagiti pasilidad nu kasapulan tapno maliklikan ti aksidente.
Ikagumaan met ti Bombo Radyo nga alaen ti benneg ti nasao a mall.
