Mabalinen a makagatang ti publiko iti bagas manipud kadagiti bodega ti National Food Authority (NFA) kadagiti pagtagilakuan ken napili a retailer ti Kadiwa mangrugi iti sumaruno a lawas.
Dagiti bodega nga agtaltalinaed a nasayaat ti pannakaurnong ti bagas ti National Food Authority (NFA) ket masarakan sadiay Ilocos Region, Cagayan Valley, Central Luzon, Western Visayas, ken SOCCKSARGEN.
Tapno mawayawayaan ti espasio sakbay ti panawen ti panagani, rugian ti NFA ti aglako kadagiti baro nga stocked rice babaen ti Rice for All Program iti P35 tunggal kilo a bagas.
Ti food security emergency declaration ti gobierno ti nangpalubos iti NFA a mangiruar kadagiti buffer stocks tapno makatulong a mangpatalinaed iti presio ti bagas, sigun kenni NFA Administrator Larry Lacson.
Kabayatana, naituding inton sumaruno a lawas a mailako dagiti “aging rice stocks” iti nababbaba a presio a dumanon iti P29 tunggal kilo, a para laeng kadagiti senior citizens, persons with disabilities (PWDs), solo parents, ken benepisiario ti Pantawid Pamilyang Pilipino Program (4Ps).
