Inaprobaran ni President Ferdinand Marcos Jr. ti naisingasing a P6.793 trillion national budget para iti 2026.
Sigun kenni Palace Press Officer Claire Castro, ti naisingasing a budget para iti sumaruno a tawen ket inaprobaran ti Presidente bayat ti Cabinet meeting idi July 15, 2025.
Sigun pay kenkuana, inyunay-unay ni President Marcos Jr. a ti 2026 budget ket saan laeng a maipapan iti panagdur-as ti ekonomia no di ket, maipapan iti panangitandudo iti biag ti tunggal Pilipino ken dagiti sumaruno a henerasion.
Innayon ni Castro nga iti sidong ti administrasion ni President Marcos Jr. ket napateg ti pagimbagan ti tunggal indibidual ken ti masakbayan dagiti umili, paturong iti ad-adda a progresibo ken narang-ay a baro a Pilipinas.
Kabayatanna, ti 2026 proposed budget ket 7.4% a nangatngato ngem ti Fiscal Year 2025 budget a P6.326 trillion, sigun iti Department of Budget and Management.
