BAGUIO CITY – Dakkel ti akem ti nangato a vaccination rate iti Cordillera iti nababa a bilang dagiti severe cases wenno nakaro a kaso ti COVID-19 infection iti rehion.
Inwaragawag daytoy ni DOH-CAR Assistant Regional Director Dr. Amelita Pangilinan iti baet ti agtultuloy a panagngato ti kaso ti COVID-19 iti rehion.
Sigun kenkuana, nasurok kagudua kadagiti aktibo a kaso ti COVID-19 iti rehion ita ket ‘mild ken asymptomatic’.
Iti kaudian a COVID-19 Tracker ti DOH idi rabii, dumanon iti agarup 9,700 ti aktibo a kaso ti COVID iti rehion a bukbuklen ti nasurok 2,730 wenno 28.19% a makapaspasar ti mild symptoms ken agarup 3,000 wenno 30.91% nga awanan ti sintomas.
Dumanon met iti 67 wenno 0.69% ti makapaspasar ti moderate symptoms bayat a 20 wenno 0.21% dagiti adda iti kritikal a kondisyon.
