Saan a maidilig ti impeachment trial ni Vice President Sara Duterte iti napaay nga impeachment complaint kontra kenni President Ferdinand R. Marcos Jr.
Daytoy ti kinuna ni Palace Press Officer Claire Castro idi nasaludsod nu maipasidong ni Marcos Jr. iti isu met laeng a wagas a kas kenni Duterte nu kaspangarigan a maipasango iti impeachment trial.
Sigun kenni Castro, saan a rumbeng nga idilig ti sitwasion ti Vice President kenni President Marcos Jr. gaputa ti president ket saan a nangbusbos ti P125 milion iti uneg laeng ti sangapulo ket maysa nga aldaw.
Innayonna pay nga ar-aramiden ti presidente ti nasayaat a trabahona ken ti panagkuenta a maitunos iti linteg.
Impaganetget ni Castro nga awan ti naawat ti Office of the President a Notice of Disallowance seknan iti confidential funds.
Maipalagip a ti impeachment complaint kontra kenni President Marcos Jr. ket inaramid ni sigud a Duterte Youth party-list Rep. Ronald Cardema ken ti asawana a ni Duceille Marie Cardema gapu iti mapapati a panangipalubosna nga iligal a matiliw ken maiyakar ni sigud a President Rodrigo Duterte.
Nupay kasta, napaayda a mangisubmitir iti reklamo iti House Secretary General a mangisaysayangkat ti strategic planning session iti dayta nga oras.
