BAGUIO CITY – Padayawan ti lokal a gobyerno ti Mt. Province dagiti naglabas a gobernador ken congressman dagitoy iti maika-50 a Foundation Day ti probinsya kagiddan ti Lang-ay Festival manipud April 3 agingga 9.
Segun kenni Novie Afidchao, Provincial Information officer ti lokal a gobyerno ti Mt. Province, mapadayawan dagitoy iti maangay a Governor’s Night.
Kinunana a mapadayawan metlaeng dagiti pimmusay nga opisyal ken alaen daytoy dagiti kapamilyada a mangibagi kadagitoy.
Malaksid iti Governor’s Night ket maipatungpal metlaeng ti civic parade ken Regional Development Council meeting sadiay.
Innayona met nga agingga ita ket ururayenda paylaeng ti kumpirmasyon manipud iti opisina ni Pres. Rodrigo Duterte ken ni Defense Secretary Jesus Dureza no dumar-ay dagitoy iti 50th Founding Anniversary ken Lang-ay Festival ti Mt. Province.
