Binigbig ni Atty. Lauro Gacayan, maysa a law expert iti siudad iti Baguio, ti State of the Nation Address ni President Ferdinand Marcos Jr. idi kalman no sadino kinunana a na-address ti presidente dagiti napateg nga isyu a kayat a mangngeg ti publiko.
Iti pannakiuman ti Bombo Radyo, kinuna ni Atty. Gacayan a positibo ti panangkita na iti nasurok nga maysa nga oras a SONA ni Marcos.
“I think, maganda naman ang mga sinabi niya sa more than one hour na State of the Nation Address.”
Sigun kenkuana, nalabit a naikkan ti presidente ti pannakailawlawag kadagiti isyu a napateg para kadagiti Pilipino.
Gapu iti daytoy, imbinglay ni Atty. Gacayan a nu para kenkuana, “excellent” iti performance ni Marcos iti pannangipresentana iti SONA.
Kabayatanna, mainaig met iti selective justice, kinuna ni Gacayan a nasayaat ti panangiwaragawag ni President Marcos, Jr. nga asidegen ti pannakaipilan iti kaso iti kasinsinna a ni former Speaker Martin Romualdez babaen iti Ombudsman.
Sigun kenni Atty. Gacayan, Ipakpakita na laeng daytoy a no agtuloy dagiti kaso uray kadagiti kaasitgan ti presidente, ipakitana a saan nga agpilpili ti administrasion iti panangipatungpal ti linteg.
“That is the best answer sa mga sinasabi ng kalaban niya about selective justice,” sigun iti abogado. // Bombo Khey Reparip
