Marikrikna ita iti sangalubongan ti kinakurang ti suplay petrolyo nga intunda ti agtultuloy a tensiyon sadiay Middle East.
Maysa ti Pilipinas kadagiti nakaru nga apektado iti nasao a sitwasyon agsipud ta agdepdepende daytoy kadagiti maang-angkat a petrolyo.
Iti kinapudnona, dakkel ti ngimmatuan ti presyo ti petrolyo ita nga aldaw ket mapagdandanagan nga agtultuloy daytoy, nga awan dua-dua a makaapektar met iti ekonomya.
Masapul nga agtignay itan ti gobyerno nga agaramid ken mangipatungpal kadagiti nainsiriban nga aksiyon sakbay a kumaru pay ti sitwasyon.
Rumbeng nga ingetan ti gobyerno ti panaka-iwanawan ti suplay ken presyo dagiti nasao a produkto, ken mangipatungpal iti programa a makatulong kadagiti maapektaran a sektor – kas iti transportasyon, agrikultura, ken dadduma pay.
Rumbeng met a padur-asen ti gobyerno ti panagpuonan kadagiti renewable energy, ken mangipatungpal iti programa a mapa-adu iti reserba a suplay ti petrolyo tapno saan a nalaka nga agsagaba ti pagilian no mapasaran ti kellaat a panagkurang iti suplay.
Ngem adda ti akem ti tunggal umili a mangsaranget iti nasao a krisis. Karaman ditoy ti panagtipid iti panagaramat iti enerhiya—kas kuma iti panag-carpool, panangliklik kadagiti saan a napateg a biyahe, ken panagaramat iti public transport imbes nga aramaten ti bukod a lugan.
Malabanan ti krisis no adda disiplina ken panakaseknan iti pada a tao. Iti baet ti aniaman a dibisyon a mamagsisina iti tunggal maysa, daytoy ti panawen a rumbeng nga agkaykaysa dagiti amin nga opisyal ken umili tapno malabanan ti aniaman nga karit nga isangbay dagiti riribuk iti sangalubongan.// ASP
