BAGUIO CITY – Pappapartaken dagiti stakeholders iti La Trinidad Vegetable Trading Post ti panangbukel ti Sangguniang Bayan kadagiti polisiya a mailanad iti maamyendaran a Trading Post Code.
Partikular a tarigagayda a mailanad iti daytoy ti requirement a nasken a maipasidong iti akredistasyon dagiti amin a buyers ken disposers nga interesado nga agnegosyo wenno makitransaksion sadiay.
Sigun kenni Agot Balanoy, panakangiwat ti liga dagiti asosasyon sadiay, kidkiddawenda ti nasao a banag kalpasan a naduktalan nga adu nga stakeholders iti Trading Post, nangruna dagiti disposers ti nabiktima iti peke ken talbod a cheke.
Inlawlawagna a babaen iti akreditasyon ket maamuan ti pudpudno a nagan ken address dagiti buyers ken disposers tapnu nalaka a mabirukan dagitoy no adda ti aramidenda a kalukuan ken dagiti agbalin a disposers nga awanan ti umdas a puonan ket saan pay a mapalubosan sadiay.
Impettengna nga iti amin a mapaspasamak sadiay ket dagiti mannalon ti kangrunaan a maapektaran gaputa dagitoy ti saan a mabayadan.
Innayon ni Balanoy nga agaramidda iti sabali manen a surat nga ipatulodda iti municipal council ken iramanda dagiti sample dagiti peke a cheke a naibayad kadagiti disposers sadiay.
Mangnamnamada a babaen iti panakaipasidong dagiti buyers ken disposers iti akreditasyon ket maliklikan ti aniaman a panangloko kadagiti stakeholders nga agnegnegosyo ken addaan transaksion sadiay Trading Post.
