BAGUIO CITY – Inadaptar ti probinsia ti Montañosa ni National Anti – Poverty Commission lead convenor ken secretary Liza Maza kas anak ti Mt. Province.
Naisayangkat ti seremonya kagiddan ti personal a panagsarungkar ni Maza iti nasao a probinsia tapnu kitaenna ti kasasaad dagiti rice terraces sadiay.
Sigun kenni Governor Bonifacio Lacwasan, napanaganan ni Maza a “Kuliplipan” a kaipapananna ket “crusader”.
Inladawanna a ti ‘Kuliplipan’ ket maysa a babae nga addaan ti nasayaat a panagpuspuso, kind in spirit ngem awanan panagbuteng a mangisakit kadagiti nakukurapay ken maparparigat.
Nakawesan daytoy iti kawes ti tribo ti Ga’dang manipud iti eastern Mt. Province a bukbuklen ti tapis wenno wrap-around skirt, bakawat wenno belt ken singat wenno crown a naaramid ti beads.
Nalaos met ti panagyaman ni Maza kadagiti umili ti Mt. Province iti nabara a panagpasangbay ti probinsia kenkuana ken iti panaka-adaptarna kas anak ti Montañosa.
