BAGUIO CITY – Mangnamnama ti lokal a gobyerno ti Baguio a kalpasan ti dua a lawas nga implementasyon dagiti baro a restrictions iti panaggaraw ken aktibidad ditoy siudad ket maksayan ti kaso ti COVID-19 ken maputed ti local transmission.
Iti panakiuman ti Bombo Radyo Baguio kenni Atty. Althea Alberto, Executive Assistant IV iti City Mayor’s Office, kinunana a dagitoy ket ti panakaiparit ti non-essential travel dagiti non-Baguio residents, ti panakabaliw ti oras ti liqour ban ken ti panakailaylayon ti age-based home restrictions dagiti 17-anyos nga agpababa.
Sigun kenkuana, manipud iti sigud a 10PM-10AM a liqour ban ket nabaliwan ken nagbalin nga 8PM agingga 12NN.
Innayonna a manipud iti 15-anyos nga agpababa ket nagbalinen a 17-anyos nga agpababa ti tawen dagiti menor de edad a maiparpariten a rumwar kadagiti pagtaenganda.
Nupay kasta, dinakamatna a mabalin met a rumwar dagiti ubbing la ketdi para iti medical purpose ken kadagiti aktibidad a kasapulan ti pisikal a presensia dagitoy malaksid pay a kadagiti laeng ‘al fresco dining’ wenno iti ruar dagiti restaurants.
Inyunay-unayna a naipaulog dagiti nasao a baro a pagalagadan tapnu maksayan ti agtultuloy a panagngato ti kaso ti COVID-19 iti siudad.
Dinakamatna nga iti napalabas a dua a lawas ket nagbalin a 95-100 iti innaldaw ti mailislista a kaso ti COVID-19 iti siudad nga adayo a nangato no idilig iti 87 a kaso iti innaldaw idi maikatlo a lawas ti napalabas a bulan ti Agosto.
Innayon pay ni Atty. Alberto a ngimmato metlaeng ti kaso ti COVID-19 kadagiti menor de edad manipud idi Hulyo agingga Agosto.
