BAGUIO CITY – Impannakkel ti City Treasury ti Baguio ti agarup 50 porsiento a nakolektarda a buis iti uneg ti nasurok uppat a bulan manipud iti naituding a target collection ti opisina ita a tawen a dumanon iti P1.82 billion.
Sigun kenni City Treasurer Alex Cabarubias, manipud Enero agingga ita a bulan ket nakakolektarda iti P128 million manipud kadagiti real property taxes.
Kinunana a nakakolektarda met iti P288 million manipud kadagiti business taxes bayat a nakakolektarda iti P151 million manipud kadagiti other fees and charges.
Innayonna a saan met a mapapaay ti nasyonal a gobyerno a mangipapaay iti internal revenue allotment para iti siudad ti Baguio.
Sigun kenkuana, manipud iti P755 million a mapattapatta a maawat ti siudad ita a tawen ket naipalusposen ti P253 million iti daytoy.
Nupay kasta, inaklon met ni City Treasurer Cabarubias nga agingga ita ket bassit latta ti panagbusbos ti lokal a gobyerno ti Baguio para iti implementasyon dagiti proyekto para kadagiti umili.
Inyunay-unayna pay nga adda ti pondo para iti panakaipatungpal dagiti progama ken proyekto a pagsayaatan dagiti umili isut gapuna a rumbeng a maimplementar dagitoy tapnu saan a masayang ti pondo.
