Nailukaten iti trapiko ti nargaay a Pilando Road idiay Gambang, Bakun, Benguet kalpasan ti siyam nga aldaw a “binnadang” tapno maisimpa daytoy.
Maipalagip nga idi napan a bulan ket nargaay ti Pilando Road kagiddan ti napigsa a panagbayakabak ti tudo.
Gapu iti daytoy, napilitan dagiti biyahero a magna kadagiti alternatibo a ruta banag a nangpaadayo iti biaheda.
Saan met a nagbayag ket naiyaramidan iti alternatibo wenno detour road ti makinngato a paset ti nargaay a Pilando Road babaen iti pribado a lote kas temporaryo a pagnaan dagiti biyahero bayat a maisaksakad ti permanente a solusyon iti nargaay a Pilando Road.
Daytoy ket babaen iti inisyatibo ni Benguet Vice Governor Ericson “Tagel” Felipe a nangkasarita iti indibidual a makinbagi iti pribado a lote tapno maabangan iti makatawen.
Babaen met iti panagmaymaysa ken panagbinaddang dagiti umili, nagduduma nga ahensiya ti gobyerno ken opisyales kas iti inisyatibo ni Congressman Eric Go Yap nga agbiruk iti pundo ket naisubli ti nargaay a Pilando Road ken nailukat daytoy ita a rabii.
Manamnama a babaen iti daytoy ket naannayasen ti panagbiahe dagiti lugan a saan a nasken a magna kadagiti adayo a disso.
Immuna metten a kinuna ni Congressman Yap babaen iti Department of Public Works and Highway a ti kasayaatan a solusyon iti Piland road ket ti pannakaibangon ti cabel-stayed bridge nga isu ti isapsapulanda ita iti pundo.
