BAGUIO CITY – Nakipaset ti maysa a COVID-19 positive patient ti Baguio City iti manarimaan nga international clinical trial a naawagan ti Solidarity Trial para iti panakabiruk ti agas kontra iti COVID-19.
Nabigbig daytoy a ni John Delinger Batulan, nars iti Baguio General Hospital and Medical Center (BGHMC) a nakaptan ti COVID-19.
Naamuan a daytoy ti kaunaan a pasyente a nakaptan ti COVID-19 ditoy Baguio a makipaset iti nasao a clinical trial a pakasuksukimatan ti uppat a klase ti agas.
Impaay ni Batulan ti pammalubosna kadagiti otoridad ti BGHMC para iti panakaipasidongna iti nasao a trial kalpasan a nagpirma iti consent form idi Martes, June 2 iti mismo nga aldaw a nakumpirmar ti panagpositibona iti nasao a sakit.
Sigun kenkuana, kayatna nga agbalin a paset ti solosyon iti agdama a parikut iti baet dagiti risgo ken karit a sangwenna kabayatan ti clinical trial.
Imbingayna a kalpasan a na-stabilize ti vitals ken creatinine levels ni Batulan ket naipaay kenkuana ti experimental medicine.
Naamuan a ni Batulan ket nars iti psychiatric ward ti BGHMC ken daytoy ket maysa a cancer survivor idi 2016.
