BAGUIO CITY – Imbestigaran ti Department of Environment and Natural Resources (DENR)-Cordillera ti nasaknap nga iligal a quarrying sadiay Bued River partikular iti paset ti Camp 1, Tuba, Benguet.
Sigun kenni DENR-Cordillera Regional Director Engr. Ralph Pablo, maimbestigaran ti nasao a banag kalpasan a naireklamo daytoy iti opisinada.
Kinunana nga awan ti napalubusan a quarrying activity iti nadakamat a karayan.
Maibasar iti reklamo, maysa a kompanya ti nangibilin iti naduma-duma a contractor nga agal-ala kadagiti batbato iti karayan.
Kalpasanna ket maipatulod dagiti bat-bato sadiay San Fernando City, La Union ken maiturong dagitoy sadiay Bulacan.
Kinuna ni Pablo a duktalen ti DENR no adda ti kaskenan a papeles ti nasao a kompanya ken ti contractor.
Inlawlawagna a napateg dagiti dadakkel a batbato iti panakalapped iti panagreggaay ti daga iti riverbank.
