Mangrugin ti nasantuan a bulan ti Ramadan iti Pilipinas inton bigat, Marso a uno, sigun iti Bangsamoro Grand Mufti
Impakaammo daytoy ni Sheikh Abdulrauf Guialani idi kalman kalpasan nga inaramid dagiti partikular a grupo ti “moon sighting” iti intero a pagilian.
Ti petsa ti panangrugi ti Ramadan ket nagduduma kadagiti nadumaduma a pagilian gaputa agpannurayda laeng iti panagkita ti bulan iti tunggal maysa iti bukodda a lokasion wenno lugar.
Ti Ramadan ket ti maika-sima a bulan ti Islamic calendar.
Namarkaan kas panawen ti “fasting” ken panagkararag, dagiti Muslim ket saan a mabalin a mangan ken aginom manipod iti panagsingising ti init agingga panaglennek ti init.
Dagiti saan a mabalin a makipaset ket dagiti makapaspasar ti sakit iti pisikal ken iti mental, kasta metten dagiti masikog ken “breastfeeding” a babbai, ken nataengan a tattao nu ti panag-fasting dagitoy ket mangitunda iti panagkapsut ti salun-atda.
Saan metlaeng a mabalin nga agsigarilio ken makipaset iti aniaman a seksual nga aktibidad bayat ti nasantuan a bulan ti Ramadan dagiti Muslim.
Kabayatanna, ti Eid al-Fitr ket mangtanda ti panagpatingga ti Ramadan ken marambakan bayat ti umuna a tallo nga aldaw ti Shawwal, ti maika-10 a bulan ti Islamic calendar.
Ti pannakaipakaammo ti petsa ket ipablaak ti mufti maibasar iti resulta ti pannakakita iti bulan iti partikular nga oras.
