BAGUIO CITY – Pwersado a naibakwit dagiti 11 a pamilya a bukbuklen ti 43 nga indibidual sadiay Sitio Goldfield, Barangay Poblacion, Itogon, Benguet idi agsapa kalman.
Iti panakiuman ti Bombo Radyo, kinuna ni PCI Eugene Raymundo, chief of police ti Itogon Municipal Police Station, intunda daytoy ti killaat a panagruar ti danum iti daan a tunnel wenno usok ti Atlas Mining and Development Corporation a masarakan iti baba dagiti pagtaengan dagiti naibakwit.
Kinunana nga awan ti nadadael a pagtaengan ngem forced evacuation ti impatungpalda gapu iti posibilidad a maguyod ti daga wenno bantay iti ngato dagiti nasao a babbalay.
Innayonna a kinabilanda iti police line ti nasao a disso ken agtultuloy ti panangbantayda tapnu maipasigurado nga awan kadagiti agindeg kadagiti babbalay ti agsubli sadiay.
Immuna a naiturong dagiti evacuees iti Goldfield Elementary School ken naipaayanda iti relief goods sakbay dagitoy a nagturong kadagiti kakabagianda.
Kabayatanna, mangipatungpal iti panagadal ita nga aldaw ti lokal a gobyerno ti Itogon, ti Benguet Corporation ken ti Mines and Geosciences Bureau – Cordillera iti nasao a lugar.
Sigun kenni Itogon Mayor Victorio Palangdan, adalenda ti plano ti nasao a lugar tapnu maamuan no anya dagiti parikut a maipaayan ti remedyo.
Kinunana a kitaenda ti volume ti danum nga agtultuloy nga agay-ayos manipud iti nasao nga abot a masarakan iti baba dagiti babbalay dagiti pamilya a pwersado a nagbakwit sadiay.
Patienna a posible nga intunda ti napasaran a panagtudtudo idi napalabas a lawas agingga idi kalman ti panagruar ti danum.
Kiniddaw pay ti lokal a gobyerno ti Itogon ti kooperasyon dagiti 11 a pamilya a nagbakwit tapnu saanda pay nga agsubli iti babbalay dagitoy.
