BAGUIO CITY – Dumanon iti 15,500 dagiti agtutubo a nakipaset iti entrance examination ti Philippine Military Academy (PMA) kadagiti 24 nga examination centers iti entero a pagilian.
Sigun kenni Lt. Col. Reynaldo Balido Jr., panakangiwat ti PMA, kaaduan kadagiti nakipaset iti eksaminasyon ket dagiti walk-in applicants.
Kinunana a kadagiti nagasat a makapasa a mapili dagiti 350 nga agbalin a kadete a mangbukel to iti PMA Class of 2022.
Dinakamatna nga urayen laeng dagiti nakipaset iti eksaminasyon ti resulta kalpasan ti makabulan ken pagsaganaanda ti physical ken medical examination a maipatungpal iti AFP Medical Center sadiay Quezon City.
Innayonna a maipablaak to ti resulta ti entrance examination iti facebook ken website ti PMA, maipablaak iti pagiwarnak ken maipatulodan iti surat dagiti nakapasa.
