BAGUIO CITY – Naipanamnama ti nainget a panagwanawan dagiti pulis ti Cordillera ita a holiday season.
Sigun kenni Police Regional Office Cordillera (PROCOR) public information officer PCapt. Marnie Abellanida, nasurok iti 1,100 a pulis ti maiwaras iti nagduduma a probinsiya ken siudad iti rehiyon.
Kinunana a nagtaud dagiti nasao a pulis iti nagduduma nga opisina iti regional headquarter ti pulisya iti rehion.
Maibasar iti rekord ti Regional Operations Management Division ti PROCOR, 445 a pulis ti maiwaras kas road safety marshals, pakairamanan dagiti agwanawan kadagiti nagduduma a terminal dagiti lugan iti rehiyon.
Agbantay dagiti 702 a pulis kadagiti community firecracker zones, firecracker display areas, merkado publiko, parke, malls, ken simbaan.
Agserbi met kas Reactionary Standby Support Force dagiti 359 a pulis tapnu adda ti dagus nga agresponde no adda dagiti yunit nga agkasapulan ti kanayunan a pwersa.
Kabayatanna, iwaras metlaeng ti PROCOR ti 2,510 a personnel dagitoy kas force multipliers a buklen ti barangay peacekeeping action teams ken volunteers manipod kadagiti civic organizations.
