[Naduklatalan a nagtaud dagitoy iti supermarket ti kadakkelan a mall ditoy Baguio City]
BAGUIO CITY – Naikalin iti maysa a sementeryo sadiay Poblacion, Tuba, Benguet ti nasurok 33 a karton a naglaon iti nadadael a karne ti manok nga immunan a naibelleng iti sirok ti rangtay sadiay Badiwan, Poblacion, tallo nga aldaw ti napalabas.
Immuna iti daytoy, nagturong ti Municipal Environment and Natural Resources Office (MENRO) – Tuba ken dagiti opisyales ti Barangay Poblacion, Tuba sadiay Department of Agriculture – Cordillera tapnu kapatang ti ahensia para iti panakaikali dagiti nasao a karne iti paset ti Dairy Farm.
Nagturongda pay iti General Services Office ti Baguio City tapnu kasarita dagiti personnel sadiay para iti kapada a banag.
Nupay kasta, pinagkedkedan ti Department of Agriculture – Cordillera ti nasao a kiddaw.
Gapu iti daytoy, imbunagda dagiti nasao a karton iti maysa a sementeryo a nakaikalian dagitoy kalpasan a nakabilanda iti disinfectant.
Maipalagip nga iti panakiyuman ti Bombo Radyo kenni Punong Barangay Oliver Paus ti Poblacion, Tuba ket kinunana ti nakaibellengan dagiti karton ket temporaryo nga staging area dagiti basura ti barangayda a para laeng kadagiti residual wastes.
Impetteng pay ni Engr. Sammy Paquit, dadaulo ti MENRO-Tuba a nagtaud iti kadakkelan a mall ditoy siudad ti Baguio dagiti nasao a karne.
Imbingayna a bayat ti panangikalida kadagiti madadael a karne ket naduktalanda nga adda ti “price tag” kadagiti karton a mangpaneknek a dagitoy ket manipod iti supermarket ti nasao a mall ken nalawag a nakasurat ti nagan ti mall kadagiti naaramat a karton.
Inlawlawagna pay a saanda nga ibagbaga a ti mismo a mall ti nangibelleng kadagiti nasao a produkto no di ket nagtaud dagiti nasao a karne iti supermarket ti nasao a mall.
