Adda laengen iti agingga iti Abril 30 ti nasurok tallo gasut a tricycle drivers iti rehion Cordilera tapno i-claim wenno alaen ti P5,000 cash relief assistance (CRA), sigun iti Department of Social Welfare and Development (DSWD).
Kinuna ni acting DSWD-CAR Director Enrique Gascon a maisubli iti national office ti pondo nu saan daytoy a maala sakbay a malpas ti agdama a bulan.
Karaman kadagiti saan pay a nakaala iti ayuda ket ti 101 manipod Benguet, 94 idiay Abra, 49 idiay Mountain Province, 48 idiay Ifugao, ken 26 idiay Apayao. Saan paylaeng met a maamuan nu manu ti bilang idiay Kalinga.
Narugian ti panangiwaras iti ayuda idi Abril 8 idiay Tabuk City, nu sadinno 1,143 drayber ti nakaawat, ken sinaruno daytoy iti naggidan a payout idi Abril 16 para iti 7,495 benepisyaryo iti 58 a munisipyu.
Inlawlawag iti DSWD a saanda a patgan dagiti representative iti panag-claim iti ayuda.
Kasapulan a personal nga agturong ti benepisiario iti social welfare office iti lugarda babaen iti panangitugot ti orihinal ken kopia iti driver’s license, ken rumbeng a maitunos ti nagan iti listaan.
Ginuyugoy iti ahensia dagiti benepisiario nga alaen ti ayuda tapno saan daytoy a masayang ken makatulong iti kasapulanda.
