BAGUIO CITY – Inpaiman ti Department of Agriculture (DA) – Cordillera ti pakabuklan a 51.4 kilograms ti nagduduma a bukel ti nateng nga aggatad amin iti agarup P94-K iti lokal a gobyerno ti Baguio City, partikular iti City Veterinarian and Agriculture Office.
Sigun kenni DA-Cordillera Regional Executive Director Cameron Odsey, paset daytoy ti panangsuportarda iti survival garden nga inyusuat ti lokal a gobyerno ti Baguio a mabalin a pagtaudan ti taraon dagiti umili kagiddan ti manarimaan nga Enhanced Community Quarantine iti Luzon gapu iti COVID-19.
Dagiti nasao a nateng ket barak beans, kamatis, kalabasa, pechay, pipino, okra, pole beans ken lettuce.
Innayon ni Odsey a babaen iti survival gardening project ket maguyugoy dagiti umili ti Baguio nga agimula kadagiti mabiit a maapit a nateng tapnu saandan a rumwar kadagiti pagtaenganda nga apan gumatang iti merkado.
Dinakamatna pay nga isagsagana metten ti DA-Cordillera ken ti lokal a gobyerno ti Baguio ti maysa a proyekto a naawagan ti “Gulayan sa Barangay and Urban Gardening” tapnu maipanamnama ti umdas a suplay ti taraon ditoy siudad.
