BAGUIO CITY – Nasurok iti 50 nga indibidual ti naipasidong iti dua nga aldaw a libre a human immunodeficiency virus (HIV) testing nga impatungpal ti Baguio Health Services Office sadiay People’s Park ditoy siudad ti Baguio, kabinnadangda ti LGBT community.
Naamuan nga adda pay ti naiwaras a condom ken paset dagitoy ti kampanta ti Health Department para iti panakasalwad ti bagi wenno salun-at nangruna dagiti sexually active nga indibidual manipud iti HIV/AIDS.
Iti met panakiyuman ti Bombo Radyo kenni Myke Sotero, maysa a kameng ti LGBT ditoy lokalidad, impettengna a nasken a saan nga ikabain ti panagpa-HIV testing.
Kinunana a daytoy ket tapnu maamuan no positibo wenno negatibo ti maysa a tao manipud iti HIV ken tapnu ammo ti maseknan ti aramiden daytoy ken makaliklikda kadagiti sakit a mabalin a maala manipud kadagiti aktibo iti panakinaig.
Innayonna a no HIV negative ket nasken nga agtalinaed a negatibo dagitoy ken salwadanda ti bagida ken dagiti ay-ayatenda iti biag bayat a no HIV positive ket nasken a dagus dagitoy nga agpataming wenno agpa-agas tapnu saanda a maka-akar iti dadduma a tattao.
Kinunana pay a ti kapeggadan nga status ket ti panagbalin nga HIV ignorant gaputa adu met dagiti wagas tapnu maimpormaran seknan iti nasao a kita ti sakit ken dagiti wagas tapnu maliklikan daytoy.
