BAGUIO CITY – Nangisayangkat iti nagduduma a tree planting activities dagiti nagduduma nga yunit ti Police Regional Office Cordillera (PROCOR) kas paset ti “Makakalikasan” a maysa kadagiti organizational core values ti pulisya.
Paset pay daytoy ti Plant a Tree Program: The PNP’s New Normal of Disaster Preparedness and Response a pammilin ti dadaulo ti Philippine National Police.
Maibasar iti datus ti PROCOR, ita a bulan ti Pebrero ket nakaimulada iti nasurok 11,200 a kayo iti nagduduma a paset ti rehiyon Cordillera.
Nailista ti Ifugao Police Provincial Office ti kaaduan a bilang dagiti naimula a kayo a sinaruno ti Benguet Police Provincial Office, Baguio City Police Office ken Apayao Police Provincial Office.
Naamuan nga iti Plant a Tree Program ket nasken nga agimula iti agarup 10 a bunubon ti maysa a pulis tunggal innem a bulan no sadino, ti bunubon ket nasken a prutas wenno kayo a masarakan iti lugar dagitoy.
Puntirya ti PROCOR a makaimula iti 66,160 a kayo para iti umuna a kagudua ti agdama a tawen ken ita ket naragpatdan ti 16.95% ti nasao a puntirya.
