BAGUIO CITY – Nasurok P70.5-M a gatad dagiti marijuana ti dinadael dagiti operatiba sadiay Barangay Loccong, Tinglayan, Kalinga.
Pinarut ken dinadael dagiti otoridad ti 337,700 a fully grown marijuana; 20,000 a gramo ti marijuana stalks ken 5,000 a gramo ti napagango a bulong dagiti marijuana nga aggatad amin iti P70,540,000.
Nadiskobre dagiti iligal a mula kadagiti 11 a marijuana plantation sites nga addaan kalawa nga 18,550 square meters.
Resulta daytoy ti dua nga aldaw a massive marijuana eradication campaign nga insayangkat dagiti municipal police stations ti Tinglayan, Lubuagan, Pasil ken Balbalan; 2nd Coy Provincial Mobile Force Company ti Tinglayan Police Provincial Office ken ti Philippine Drug Enforcement Agency – Cordillera.
Naisayangkat ti dua nga aldaw nga operasyon idi napalabas a lawas a paset ti Oplan Green Pearl Alpha ken Oplan Linis Barangay IX.
