BAGUIO CITY-Dumanon iti pitogasut a pulis ti maiwaras iti siudad ti Baguio, partikular kadagiti lugar a pagnaan ken pagturongan dagiti kandidata ti Miss Universe a sumarungkar ditoy City of Pines inton Enero 18.
Segun kenni Acting City Director PSSupt. Ramil Saculles, uppat a gasut a pulis ti ipaay nga augmentation force ti Police Regional Office Cordillera a tumulong iti puersa dagitoy.
Segun kenkuana, nakasaganan ti security plan ken ti pulisya, agramanen dagiti special unit, security convoy ken dadduma pay a volunteers a mangipaay iti seguridad iti nasao nga aldaw.
Impannakel met ni Saculles a maitunos iti national ken international standard ti inaramidda a security plan, traffic rerouting scheme ken ti panakabantay dagiti critical areas.
Kinunana a full force ti deployment dagiti pulis manrugi inton Enero 17 agingga inton Enero 19 a departure dagiti kandidata ditoy siudad.
Kabayatanna, dumanon met iti 143 a fire personnel ti maiwaras iti uneg ti Loakan Airport, malaksid pay kadagiti dua a firetrucks, sangapulo ket uppat nga ambulansiya ken dadduma pay a mangipaay iti tulong iti matagtagiuray nga aktibidad.
