Posible pay a ngumato ti 215,400 a pakabuklan a kaso ti human immunodeficiency virus (HIV) iti Pilipinas iti ngudo ti agdama a tawen, sigun iti Department of Health (DOH).
Maibasar iti kaudian a datos ti Department of Health, dumanon iti 4,595 ti nakumpirmar a positibo nga indibidual iti HIV manipod Hulio agingga Setiembre iti agdama a tawen.
Iti nasao a bilang, 1,301 wenno 28% ti addaan ti “advanced HIV infection” idi tiempo ti pannakadayagnosda.
Dumanon pay iti 50 a kaso ti HIV a nairekord iti pagilian iti tunggal aldaw.
Iti baro a kaso, 4,362 wenno 95% ti lallaki bayat a 233 wenno 5% ti babbai.
Iti age group, 24 a kaso ket agtawen ti 15 agpababa idi tiempo ti pannakadayagnosda; 1,472 ti agtawen iti 15-24; 2,179 ti agtawen iti 25-34; ket dagiti dadduma ket agtawen iti 35 ken natataengan.
Iti pakabuklan, saan a bummaba iti 139,662 ti nakumpirmar a kaso ti HIV ti naipadamag iti HIV/AIDS ken ART Registry ti Pilipinas sipud idi naduktala ti umuna a kaso ti pagilian idi 1984.
Kagiddan ti panagrambak ti World AIDS Day idi kalman, impakaamo ti Department of Health a rinugiandan ti “Undetectable = Untransmittable Campaign” iti panangikagumaanda a manglapped iti umad-adu a bilang, tapno malabanan ti stigma mainaig iti virus, ken tapno maipakaamo ti impormasion ti publiko maipapan ti prevention, testing, ken treatment for HIV.
Iti panangdakamatda ti AIDS Epidemic Model, nagballaag ti nasao nga ahensia a mabalin a ngumato pay ti kaso a dumanon 448,000 inton 2030 nu saan a maprebentaran ken awan ti aniaman nga intervention a maaramid.
Ti kaso ti HIV iti Pilipinas ket bimmaba bayat ti pandemia a dumanon iti 8,031 idi 2020 manipod iti bilang a 12,723 sakbay ti nasao a tawen.
Manipod iti dayta a panawen, ngimmato ti bilang nu sadinno 12,329 idi 2021, 14,935 idi 2022 ken ad-adda pay a ngimmato iti 17,254 idi 2023.
Kabayatanna, impaganetget ni Department of Health Secretary Ted Herbosa a ti nasapa a pannakaduktal ti virus ket tulbek tapno maimanehar daytoy ken mapasayaat ti resulta ti salun-at.
