VIGAN CITY – Tinakaw ti 18-anyos a lalaki ti nasurok P1-M a kwarta ken lugan ti lolona idiay Barangay Don Lorenzo, Caoayan, Ilocos Sur itay nabiit.
Iti interview ti Bombo Radyo Vigan, kinuna ni PCapt. Medel Perinion, dadaulo ti Caoayan Municipal Police Station, ti biktima ket ni Reynaldo Querubin Queypo, 76-anyos, negosyante bayat a ti suspek ket ni Art Pespes Manuel, 18-anyos, baro ken Out-of-school youth, agpada dagitoy a residente ti Barangay Don Lorenzo Querubin, Caoayan, Ilocos Sur.
Maibasar iti CCTV footage, pwersado a nilukatan ti suspek ti sliding window ti pagtaengan ti biktima nga isu ti sinumrekanna idi rabii ti Marso baente singko.
Idi nakastrek ti suspek iti balay, pwersado a nilukatanna dagiti sumagmamano a drawer iti salas ken ditoy nga inalana ti kwarta ken susi ti toyota fortuner sakbay a timmaray.
Naipakaammo met kadagiti otoridad ti presensiya ti suspek idiay Caboloan, Sta. Catalina a nangitunda iti pannakatiliwna.
Maibasar pay iti report, siguden nga agkabbalay dagiti aglolo ngem gapu iti namin ado a daras a panangisalda ti suspek kadagiti saanna a kukua ket nauman ti biktima a mangsaka kadagitoy.
Manamnama a mapilaan ti suspek ti kaso a carnapping ken robbery.
