BAGUIO CITY – Nasurok P1 million ti gatad dagiti marijuana dried leaves ken hashish oil a nakumpiskar dagiti otoridad iti impatungpalda a checkpoint sadiay Ibulao, Baguinge, Kiangan, Ifugao idi August 21.
Iti panakipatang ti Bombo Radyo Baguio kenni Atty. Joseph Fredrick Calulut, information officer ti PDEA-Cordillera, kinunana a ti checkpoint ket impatungpal ti nagtitipon a pwersa ti Kiangan Municipal Police Station, Lagawe Municipal Police Station, Ifugao PPO iti koordinasyon ti PDEA-Cordillera ken PDEA-Region 2.
Kinunana a nangitunda daytoy iti panakakemmeg ti dua a turista a suspek manipud Las Piñas City a mangibiahe kuma kadagiti nasao a banag.
Nabigbig dagiti suspek a da Marian Natalie Zarate Pal ken Andrian Brogen [BROHENA] bayat a ti nagluganan dagitoy ket grey a kotse nga addaan plaka a TIM 923.
Nakumpiskar pay kadagitoy dagiti nagduduma a drug paraphernalia.
Sigun pay kenni Calulut, dagiti nakumpiskar a marijuana ket dagiti nabati a suplay kalpasan dagiti naisaysayangkat a marijuana eradicatrion iti nagduduma a paset ti rehion nga addaan ti pagmulaan iti maiparit a mula.
Iti panakiuman pay ti Bombo Baguio News Team kenni PCI Roy Awisan, hepe ti Kiangan PNP, kinunana a nagtaud dagiti suspek sadiay Tinglayan, Kalinga a nagpa-tattoo kenni Apo Wang-Od.
