BAGUIO CITY – Agtultuloy ti panangduktal dagiti pulis no nagtaudan dagiti iligal a droga a nakumpiskar manipud kadagiti uppat nga indibidual iti checkpoint operation nga impatungpal ti Banaue Municipal Police Station iti deppaar ti Poblacion, Banaue, Ifugao idi laeng nabii.
Sigun kenni PCI Ernesto Bekesan, hepe ti Banaue PNP, dumanon iti nasurok P300,000 ti gatad dagiti iligal a droga a nakumpiskar dagitoy iti nasao nga operasyon a nangkemmeganda met iti dua a lallaki ken dua a babbae.
Kinunana a maysa kadagiti nakemmeg ti tubo ti Mt. Province bayat a nagtaud met sadiay Quezon City ken Zambales City dagiti tallo a nakemmeg.
Sigun kenkuana, nakaawatda iti impormasyon manipud iti pulisya ti Mt. Province mainaig iti pannakaibiyahe dagiti nasao a kontrabando isut gapuna a dagusda a nangipatungpal iti checkpoint operation.
Nangitunda ti operasyon iti panakakumpiskar ti 8,228 a gramo ti marijuana nga aggatad ti nasurok P205,700 ken nasurok 21 a gramo ti shabu nga aggatad ti P105,600.
Dinakamatna a nagtaud dagiti nakalugan a suspek sadiay Mt. Province ken agturong kuma dagitoy sadiay Nueva Viscaya.
