BAGUIO CITY – Dinadael dagiti otoridad ti nasurok P60-M a gatad dagiti iligal a droga a nakumpiskar kadagiti serye ti operasyon kontra iti iligal a droga iti rehion Cordillera.
Naisayangkat ti panagdadael kadagiti nasao nga illegal drug evidence iti thermal facility ti maysa a nalatak a kompanya ti semento a masarakan sadiay Bacnotan, La Union idi kalman.
Maibasar iti listaan ti PDEA-Cordillera, dagiti nadadael nga iligal a droga ket agdagsen ti nasurok 417,300 grams ken bukbuklen ti dumanon 1,500 a gramo ti shabu; 37.4 mL ti liquid methamphetamine; nasurok 415,800 a gramo ti marijuana ken 52 a puon ti marijuana.
Nagtaud dagiti iligal a droga iti 244 a kaso a naipila ken nakedngan iti nagduduma a korte iti Cordillera.
Sigun kadagiti otoridad, ti panakadadael dagiti nagserbi nga illegal drug evidence ket maitunos iti pammilin ni Presidente Rodrigo Duterte ken iti R.A. 9165 a nakailanadan ti probisyon a nasken a madadael dagiti drug evidence kalpasan ti panakaiparangda iti korte tapnu maliklikan ti panakairesiklo dagitoy.
Nagpirma pay iti katulagan ti PDEA-Cordillera ken ti nasao a kompanya para iti nawaya a panagaramat dagiti otoridad iti destruction facility ti kompanya, partikular ti thermal process para iti panakadadael dagiti drug evidences a kinednganen dagiti korte iti rehiyon Cordillera.
