BAGUIO CITY – DUMANON iti nasurok P600, 000 ti gatad ti marijuana bricks a nakumpiskar manipud iti maysa a lugan sadiay Sitio Latang, Lower Caluttit, Bontoc, Mt. Province itay laeng nabiit.
Segun iti Cordillera PNP, nangipatungpal iti checkpoint ti 1st Maneuver Platoon ti Mt Province Provincial Public Safety Company iti nasao a lugar idi pinarada ti puraw a crosswind nga addaan iti plaka nga XEL-162.
Bayat ti panangipatungpalda iti visual inspection ket nakita ti operatiba ti sumagmamano a marijuana bricks iti front passenger seat isut gapuna nga impalukatda iti driver ken iti kadwana dagiti bag dagitoy.
Sadiay a nakita dagiti otoridad ti innem a marijuana bricks nga agdagsen iti nasurok kumurang 6.11 kgs.
Nakemmeg met ti driver ti lugan a da Mark Justin Jemilla Dayrit, 22, ken ti kadwana a ni Bob Bruce Dionisio Jr., 21, agparada a residente ti Sitio Dau, Barangay Mabalacat, Pampanga.
Dagiti suspek ket sumangsango ita iti kaso a panaglabsing iti Comprehensive Dangerous Drugs Act of 2002.
