BAGUIO CITY – Agtultuloy ti panagbayad ti PhilHealth – Cordillera kadagiti claims dagiti sumagmamano a pagagasan ken isolation facilities ditoy siudad ti Baguio.
Sigun kenni PhilHealth-Cordillera Acting Vice President Dr. Dominga Gadgad, nasuroken iti P65.3-M ti nabayadanda kadagiti isolation facilities ken ospital iti siudad.
Maibasar iti datos ti PhilHealth-Cordillera, P11-M ti binayadanda iti Santo Niño Isolation Facility bayat a P12-M ti binayadanda iti Teacher’s Camp Isolation Facility a katukad ti P23-M para iti 1,028 a claims.
Dumanon met iti P28-M ti binayadanda iti Baguio General Hospital and Medical Center bayat a nasurok P4-M iti Notre Dame Hospital, P3.9-M iti Pines City Doctor’s Hospital ken P6.4-M iti SLU Hospital.
Maibasar iti programa ti PhilHealth, agididiayada ti laboratory testing package manipud P990 agingga iti nasurok P3,000 ken community isolation a nasurok P22,000 para iti 14-day quarantine ti pasyente.
Innayon ni Gadgad nga iti met pneumonia package nga ipaapay dagiti amin a pagagasan ditoy Baguio, bayadan ti PhilHealth ti mild pneumonia package a P43,000 bayat a ti moderate pneumonia package ket P143,000 ken ti severe pneumonia package ket P333,000
Dinakamatna pay a nairamanen kadagiti nasao a package ti gastos iti agas, doctor’s fee ken akomodasyon ti pasyente.-with Bombo Janice Denis
