BAGUIO CITY – Pinarut ken inuram dagiti anti-narcotics agents ti PDEA-Cordillera ken Kalinga PNP ti nasurok P9-M a gatad ti marijuana sadiay Tinglayan, Kalinga idi Biyernes.
Sigun kenni PDEA information officer Atty. Joseph Frederic Calulut, resulta daytoy ti maysa aldaw a marijuana eradication operation a naawagan ti ‘Oplan Mayflower’.
Kinunana a sadiay Barangay Loccong, Tinglayan ket nakadiskobre dagiti operatiba iti maysa a marijuana plantation site nga aglawa ti 800 sqm ken nakadadaelan ti 3,200 a pidaso ti fully-grown marijuana plants nga aggatad ti P640,000.
Kabayatanna, nakadiskobre pay dagiti operatiba iti 11 a marijuana cultivation sites sadiay Barangay Buscalan, Tinglayan nga aglawa ti 5,180 sqm ken nakadadaelan ti 41,910 a pidaso ti fully-grown marijuana plants nga aggatad ti P8,382,000.
Nupay kasta, awan ti cultivator a nakemmeg kabayatan ti nasao a kampanya.
Innayon pay ni Atty. Calulut a ti agtultuloy nga anti-drug operations sadiay Tinglayan, Kalinga ti maysa kadagiti kangrunaan nga ar-aramiden ti PDEA-Cordillera, partikular ti panangwanawanda kadagiti lugar a mabalin a pagtubuan ti marijuana kasaruno ti panakaideklara ti nasao a mula nga iligal iti sidong ti RA 9165.
