Nakumpiskar ti agarop 17 a kilo iti marijuana(tubular form) nga aggatad P2,040,000 manipod iti dua nga High Value Target idiay Upper Tomay Barangay Bahong La Trinidad, Benguet idi laeng kalman.
Kagiddan dayta, kinemmeg ti nagtitipon a pwersa iti Philippine Drug Enforcement Agency Cordillera, Philippine Drug Enforcement Unit Benguet, La Trinidad Municipal Police Station ken dadduma pay a maseknan nga opisina dagiti otorisad ti dua nga akusado iti nasiyangkat a buy-bust operation iti nadakamat a lugar.
Dagiti akusado ket agtawen iti 29 ken 27,agpada a lallaki ken residente ti Badeo Kibungan, Benguet.
Malaksid kadagiti drug evidences, nakumpiskar met laeng kadakuada dagiti non-drug evidences pakairamanan ti maysa a pidaso ti genuine 1000 peso bill, 510 pieces ti P1000 boodle money, maysa nga smartphone, maysa a driver’s license, maysa a pouch bag ken maysa a hongkong bag.
Sigun iti kameng ti Philippine Drug Enforcement Agency, nabayag a namonitor dagiti puntiryada ken adda ti pakainaiganda kadagiti immunan a nakemmeg kadagiti buy-bust operations.
Iti agdama, adda dagiti suspek iti kustodiya ti otoridad ken sumango dagitoy iti kaso a panaglabsing iti Section 5 in relation to Section 26 ti RA 9165 wenno ti Comprehensive Dangerous Drugs Act of 2002.//Bombo Jez Lapizar
