Nangipaay ti National Communications Commission-Cordillera kadagiti impormasyon seknan kadagiti scams nga agraraira iti rehiyon pakairamanan ti maysa a klase ti scam a maawagan kas International Mobile Subscriber Identity (IMSI) Catcher.
Iti pannakiuman ti Bombo Radyo kada Engineer Ylloisa Ginice Rimorin ken Shyrel Ann Dawi, inlawlawagda a ti IMSI catcher ket maysa a portable a banag a mausar tapno agpammarang kas maysa a cell tower. Nupay kasta, saan daytoy a lehitimo kas kadagiti network a maar-aramat kas iti Globe, PLDT ken dadduma pay.
Sigun kenni Engineer Rimorin, aramatenda ti nasao a peke a cell tower tapno maikonek dagiti cellphones dagiti biktima da.
Apaman a makakonekta ti cellphone iti nasao a cell tower, ditoy metten a mabalin a mapasamak ti scam gapu ta mabalindan a maintecept dagiti personal nga impormasyon iti cellphone. Ditoy da metten a mangipatulod kadagiti mensahe ken links no sadino kadawyan a pakaal-alilawan dagiti biktima iti scams.
Sigun met kenni Dawi, apaman gamin a maclick dagiti links nga inpatulodda, mabalinen a maaccess amin dagiti vulnerable nga impormasyon a linaon iti nasao a cellphone.
Inlawlawagna a maysa kadagiti senyales a nakonekta ti cellphone iti nasao a peke a cell tower ket ti killaat a panagbaliw iti network kas iti 2G manipud iti LTE.
Kanayonanna, maysa metlaeng kadagiti pangamuan nu scam dagiti maaw-awat a mensahe ket ti panangiruwar iti kwarta basit man wenno dakkel a gatad tapno maala ti premyo wenno gatad nga inkari ti maysa a message sender.
Guyguyugoyen ti National Communications Commission – Cordillera ti publiko nga irehistroda dagiti SIM Cards.
Iti pannakiuman ti Bombo Radyo kada Engineer Ylloisa Ginice Rimorin ken Shyrel Ann Dawi, inlawlawagda a makatulong daytoy iti panangtrace kadagiti SIM Cards a maar-aramat kadagiti nagduduma a scams.
Kabayatanna, impakaammo dagiti nasao nga opisyales nga iti kanito nga ada dagiti mapagduaduaan nga aktibidad iti cellphones dagitoy, mabalinda laeng nga iclose dagiti mobile data da ken icheckda a dagos dagiti online banks da.
Alalukoyenda met ti publiko a nu makapadasda iti mapagduaduan nga aktibidad kadagiti mobile phones dagitoy, dagusda nga ireport daytoy iti nasao nga opisina.
Sigun kenni Dawi, makatulong daytoy iti public awareness tapno saanen nga umado dagiti mabiktima gapu iti scams. //bombokaren.c.sapirao
