Impagetnet ti Department of National Defense (DND) nga awan ti karbengan ti Chinese Embassy nga agkiddaw iti pammalawag seknan iti operasyon ti Sanjia Steel Corporation.
Mainaig daytoy iti pannakaarestar dagiti sumagmamano a Chinese workers babaen kadagiti otoridad ken ti Armed Forces of the Philippines.
Inyunay-unay ti ahensiya nga awan ti obligasyonna a mangsungbat kadagiti saludsod manipud iti ania man a ganggannaet, nangruna ti pagilian a China.
Sigun kenni DND spokesperson Arsenio Andolong, rumbeng nga ilawlawag a mismo ti Chinese Embassy dagiti isyu gapu iti mapapati a panangipalubosna kadagiti illegal nga aktibidad iti uneg ti teritorio ti Pilipinas.
Maipalagip a kinuwestionaran ti Chinese Embassy ti nagbalin nga akem ni Defense Secretary Gilberto Teodoro Jr. iti operasyon.
Iti statement ni China embassy spokesperson Ji Lingpeng, kinuwestionaranna ti maatap a pannakibiang ni Teodoro iti maysa a law enforcement operation.
Innayon pay ti imbahada ti China a saan a sinungbatan ti DND ti salud-sud daytoy ken inawaganna ti statement ni Andolong nga “evasive and deceptive”.
Inawagan met ni Andolong kas “evasive, crass, and galling” ti nagbalin a reaksyon ti Chinese Embassy ken inawaganna a nalawag daytoy a pannakibiang iti saritaan iti uneg ti Pilipinas.
