BAGUIO CITY – Marugianen ti National Ecosavers Program for Elementary and High Schools ti Environmental Management Bureau (EMB) – Cordillera kadagiti napili a pagadalan iti Baguio, La Trinidad, Itogon, Sablan, Tuba, and Tublay (BLISTT) area.
Sigun kenni Dwight Daodao, Senior Environmental Management Specialist ti EMB-Cordillera, maisayangkat it programa iti 10 a pagadalan wenno lima manipud iti elementarya ken lima metlaeng manipud iti sekondarya.
Kinunana a babaen iti nasao a programa ket maisurwan dagiti estudyante a mangisinasina kadagiti basura dagitoy babaen iti panagresiklo.
Patienda a no maisurwan dagiti ubbing iti uneg ti pagadalan ket maiyaplikarda met daytoy iti uneg ti pagtaenganda.
Innayona nga iti nasao a programa ket ilako dagti ubbing dagiti recyclable materials a naurnong dagitoy iti mismo a pagadalanda.
Gapu iti daytoy, maipaayan iti sag-P25,000 a kapital dagiti pagadalan ken daytoy ti pangbayadda kadagiti recyclable materials nga ilako dagiti estudyante.
Sumagmamano kadagiti pagadalan ti mangipaay iti kuarta kas bayad bayat a dagiti dadduma met ket mangipaay iti school supplies kas kasukat dagiti basura.
