Nagpallagip ti National Grid Corporation of the Philippines seknan Transmission Line Safety nangnangruna ita a panagtutudo.
Iti pannakiuman ti Bombo Radyo kenni Melma Batario, Government Relations and Regional Affairs Officer, PR Department ti National Grid Corporation of the Philippines, nagpalagip daytoy iti publiko seknan kadagiti kangrunaan a liklikan nga aktibidad tapno maliklikan ti power interruption nangnangruna ita a panagtutudo.
Sigun kenni Batario, saan nga ipawil ti NGCP ti panagpatayab kadagiti kites ngem impettengna a saan kuma nga iti asideg ti transmission line ti pangipatayabanda gapu ta posible daytoy a mangitunda iti power interruption.
Maysa metlaeng a rumbeng a maliklikan ket ti panangipatakder ti pasdek iti baba kadagiti transmission line gapu ta malaksid a posible a mangitunda daytoy iti power interruption, posible pay a mangitunda daytoy iti aksidente.
Impetteng ni Batario a nangato gamin ti boltahe dagiti transmission lines no sadino dumanon daytoy iti 69,000 volts agpangato, adayo a nangatngato nu boltahe dagiti linya dagiti electrive cooperatives.
Nagpalagip metlaeng daytoy a liklikan metlaeng ti panagparada iti asideg wenno iti baba dagiti transmission lines tapno maliklikan ti power interruption. Sigun kenni Batario, mabalin gamin a masagid dagiti linya nu ag-unload dagitoy kadagiti kargada.
Agkidkiddaw metlaeng ni Batario iti publiko iti assistance babaen iti panangiyawagda kadakuada nu adda dagiti maimatanganda a panangipatakder kadagiti buildings iti asideg wenno baba ti transmission lines.
Sigun kenkuana, nakasagana met dagiti line personnelda a mapan kadagiti pasdek tapno mapakaammuan a dagos a maipawil ti panangipatakder ti anyaman nga structure iti baba dagiti transmission lines.
Inlawlawag ni Batario nga adda gamin dagiti talaga a saanda nga amo a maipawil ti anyaman nga structures asideg ken iti baba dagiti linya.
Gapu iti daytoy, ginuyugoy ni Batario ti publiko nga umawagda laeng iti opisinada babaen iti Hotline Number a 09178476427 wenno bumisitada iti opisinada a masarakan idiay Beckel, La Trinidad, Benguet tapno ipaayda ti kaskenan nga assistance a mabalinda nga ipaay iti publiko. //bombokaren.c.sapirao
