BAGUIO CITY – Mangipatungpal ti PDEA-Cordillera iti intelligence assessment kasaruno ti operasyon a nangkumpiskaranda iti rinibo a tableta ti ecstasy nga aggatad ti nasurok P3-M a naipatulod iti maysa nga address ditoy Baguio City.
Sigun kenni PDEA-Cordillera Regional Director Gil Castro, sukimatenda a nalaing no apay a nai-address ditoy siudad ti parcel a naikabilan ti ecstasy a maysa a party drug.
Kinunana a mangipatungpalda metlaeng ti naun-uneg nga imbestigasyon iti kinasiasino ti tiniliwda a nagawat iti parcel ken iti ultimate consignee wenno ti nakainaganan ti parcel.
Patienna a posible a ti panakai-address ti parcel ditoy siudad ket maysa laeng a taktika tapno maibaw-ing ti atension dagiti law enforcers sadiay National Capital Region.
Innayonna a posible metlaeng a pangpanggepen dagiti recepients ti parcel a pagbalinen ti Baguio kas baro a ‘distribution hub’ dagiti party drugs.
Kabayatanna, inyunay-unay ni Castro a saanda nga ipalubos nga adda ti makastrek iti masakupan ti PDEA-Cordillera iti nasao a kita ti iligal a droga.
