BAGUIO CITY – Nakemmeg ti maysa a negosyante a high value target kalpasan a nakumpiskaran ti iligal a droga kabayatan ti panangiserbi dagiti otoridad iti warrant of arrest daytoy sadiay Upper Abatan, Buguias, Benguet.
Nabigbig daytoy a ni Rodil Sayud Del-isen, 42-anyos, naasawan, tubo ti Tabio, Mankayan, Benguet ken residente ti Upper Abatan, Buguias, Benguet.
Nakemmeg daytoy babaen iti arrest warrant nga inserbi dagiti otoridad ken impaulog ni Presiding Judge Kode Dao-as ti Municipal Trial Court, 1st Judicial Region sadiay Tadian, Mt. Province.
Kabayatan ti panangiserbi dagiti otoridad iti arrest warrant ket kinapkapanda daytoy a nagresulta iti panakakumpiskar ti imetna a dua a paket ti maatap a shabu ken maysa a lighter.
Iti agdama ket sumangsango ni Del-isen iti kaso a panaglabsing iti RA 9165 wenno ti Comprehensive Dangerous Drugs Act of 2002.
