BAGUIO CITY – Nakemmeg ti maysa a negosyante kalpasan a nagpositibo ti search warrant a naiserbi kontra kenkuana sadiay Ananayo Street, Saphire Alley, Upper Rock Quarry Barangay, siudad ti Baguio idi parbangon kalman.
Nabigbig daytoy a ni Raymund Zabat Payoyo, 41-anyos ken agab-abang iti nasao a lugar.
Impaulog ni RTC Branc 5, Baguio City Presiding Judge Maria Ligaya Itliong-Rivera ti Search Warrant kontra iti nakemmeg nga indibidual gapu iti panaglabsingna iti RA 9165 wenno ti Comprehensive Dangerous Drugs Act of 2002.
Iti panangiserbi dagiti otoridad iti search warrant, nakumpiskar iti lugan ti suspek ti pito a sachet ti mapapati a shabu, maysa a sachet a naglaon ti residue ti mapapati a shabu ken dagitoy ket naikabil iti maysa a nangisit a plastik container, foil ken empty sachet.
Naamuan a ti suspek ket sigud a drug surrenderer ti Station 5 ti Baguio City Police Office.
