Inwaragawag ti Philippine Amusement and Gaming Corporation (PAGCOR) a saanen a mapalubusan nga umawat ti Philippine Offshore Gaming Operations (POGO) iti baro nga empleado mangrugi ita nga aldaw, Hulio 31 iti agdama a tawen.
Resulta daytoy iti bilin ni President Ferdinand “Bongbong” Marcos Jr. nga agsardeng iti operasion ti Philippine Offshore Gaming Operations (POGO) inton ngudo ti agdama a tawen.
Sigun kenni Alejandro Tengco, Chairman ti Philippine Amusement and Gaming Corporation (PAGCOR), masya a pribilehio ti lisensia nga impaay ti ahensia dagitoy ngem mabalin daytoy a maikkat aniaman nga oras.
Kabayatanna, agarup uppat a pullo a ribu a Filipino Workers manipud kadagiti uppat a pullo ket tallo a POGOS ti manamnama a maapektaran iti nationwide POGO ban.
Nupay kasta, immunan nga imbaga ti Department of Labor and Employment (DOLE) a kitaenda dagiti apektado a trabahador ti POGO, tapno maipaay ti maitunos a trabaho kadakuada ken maipaay ti panagsanay a kasapulan para iti nasaysayaat nga oportunidad para kadagitoy.
