Pormal a nadutukan kas baro a Department of Public Works and Highways (DPWH) Undersecretary for Planning and Public-Private Partnerships ni sigud a Presidential Commission on Good Government Commissioner Nicasio Conti.
Daytoy ket kinumpirmar ni DPWH Secretary Vince Dizon.
Sukatan ni Conti iti nasao a posisyon ni Maria Catalina “Cathy” Cabral nga immunan a naglusulos kalpasan a naakusaran a nagkiddaw kenni Senate President Vicente Sotto III nu kayat daytoy a mangi-insert iti proyekto iti 2026 a budget iti DPWH.
Sigun kenni Secretary Dizon, binilinna ni Conti a mangkita ken mangdalos iti programming ken budgeting system iti nasao nga ahensya.
Inaklon ni Dizon a saanna a maawatan ti sistema iti DPWH seknan iti programming ken budgeting idi damo daytoy nga inlawlawag kenkuana ni Cabral rason nga impanamnamana a maysa ti nasao a pakaseknan kadagiti mabaliwan kabayatan ti panangidaulona.
