BAGUIO CITY – Nakemmeg ti maysa a gangannaet iti panagrebbek nga insayangkat dagiti operatiba ti Regional Anti-Cybercrime Unit ti Police Regional Office Cordillera (PROCOR) ken ti Baguio City Police Office – Station 2 sadiay Pinget, Baguio City idi agsapa kalman.
Nabigbig daytoy a ni Promise Udochukwu Chigbu alyas Promise Tobais, 27-anyos ken tubo ti Port Harcourt, Rivers State, Nigeria.
Nakemmeg ni Chigbu kalpasan nga inserbi dagiti otoridad ti search warrant iti pagtaenganna ken nakumpiskar ditoy dagiti ar-aramatenna a mangallilaw kadagiti biktimana.
Sigun kenni PCol. Rommel Javier Jr., dadaulo ti PROCOR-Regional Anti-Cybercrime Unit, nagramot ti panakakemmeg ti gangannaet iti reklamo ti dua a babai a nagpatulong kadakuada.
Istilo ni Chigbu ti ‘love scam’ no sadino, agpammarang daytoy a nabaknang agingga nga armen ken gayyemenna dagiti biktimana a kadawyan a dagiti natataengan a babbai nga awanan asawa.
Kalpasan a maalana ti talek dagitoy ket sadiay nga agkiddaw iti kwarta kadagitoy kasukat ti kari nga ipatulodanna dagitoy iti package.
Kinuna ni Col. Javier nga agserserbi a komunikasyon ti suspek ken ti biktima dagiti online messaging applications nupay agpampammarang ti suspek babaen iti nagduduma a ladawan ken nagan.
Ddinakamatna a dumanonen iti agarup maysa a milyon a pisos ti naala ti suspek kadagiti biktimana.
Nakumpiskar pay iti pagtaengan ni Chigbu dagiti laptops, bank transaction lips, sim cards, cellphones ken dadduma a kagawaan nga ar-aramatenna iti panaglokona.
Gapu iti daytoy, balballaagan ti pulisya ti publiko iti panagannad dagitoy iti panag-aramat iti social media tapnu saan a maallilaw dagiti managgundaway.
Sumangsango ni Chigbu iti nagtutuon a kaso ti panaglabsing iti Access Devises Regulation Act of 1998, Anti-Bouncing Check Law, Cybercrime Prevention Act of 2012 ken forgery iti treasury wenno bank note malaksid pay iti maatap a falsification by private individual ken use of falsified documents, fictitious name ken concealing true name iti sidong ti Revised Penal Code.
