BAGUIO CITY – Natiliw iti entrapment operation ti maysa a Nigerian national a maysa kadagiti utek ti “honey love” scam ken ti nobyana a Pilipina bayat nga al-alaenda ti kwarta nga impatulod ti biktimada iti maysa a remittance center sadiay Marcos Highway, Baguio City.
Nabigbig ti Nigerian a ni WILLIAMS JOHN ANI, 29-anyos nga agpampammarang kas Lucas Chan a maysa a civil engineer sadiay South Korea bayat a nabigbig ti Pinay a ni INDIRA GEIL VILLANUEVA DUCA, 25-anyos nga agpampammarang kas Sharon a maysa a Korean Service Agent.
Temporaryong nga agnanaed dagitoy sadiay Bengao, Marcos Highway, Baguio City.
Naisayangkat ti operasyon ditoy siudad ti Baguio iti panangidaulo dagiti operatiba ti Airport Police Department ti Manila International Airport Authority (MIAA) idi Biyernes, May 21 kasaruno ti reklamo ti maysa a service woman ti Philippine Navy manipud Dasmariñas City, Cavite.
Maibasar iti report ti pulisya, kas “Lucas” ket pinaka-ammuan ni Ani ti biktima babaen iti chat nga adda ti impatulodna a package a naglaon kadagiti laptop, i-phone, relo ken kwarta.
Kalpasanna ket nakaawat ti biktima iti mensahe nga addan iti airport ti nasao a package ngem kasapulan a bayadanna ti custom clearance a P35,000.
Nupay kasta, kalpasan a binayadanna ti nasao a gatad babaen iti maysa a bank account ket nagkiddaw met ti suspek a ni Duca a nagpammarang kas agent a ni “Sharon” iti kanayonan a P145,000 para iti Certificate of Money Laundering gaputa nakitaan ti package iti dollar bills nga iligal ditoy pagilian.
Impangtada pay a maibalud ti biktima no saanna a bayadan ti nasao a gatad.
Nagduadua ti biktima ken imberipikarna iti airport ti tracking number ti nasao a package ken sadiay a nadiskobre nga awan ti nasao a package ken biktima daytoy ti “honey love” scam.
Intuloy ti biktima ti panaki-chat kadagiti suspek ken iti tulong dagiti operatiba ti Airport Police ket naisayangkat ti entrapment operation ken ditoy a naaktuwan ti panagalada iti kwarta ti biktima.
Sumangsango ita da Ani ken Duca kadagiti kaso a swindling wenno estafa babaen iti online scam ken panaglabsing iti Cybercrime Prevention Act of 2012.
Kabayatanna, tiniliw metlaeng dagiti operatiba ti Airport Police ti dua a gangannaet a suspek metlaeng iti “honey love” scam sadiay Tuba, Benguet idi May 15.
