BAGUIO CITY – Agtultuloy ti nainget a kampanya dagiti kameng ti pulisya ken daduma a yunit ken ahensiya para iti panakatiliw dagiti indibidual a nakabasol iti linteg iti rehiyon Cordillera.
Kasaruno daytoy ti panakakemmeg ti No.1 Top Most Wanted Person iti provincial level gapu iti kaso a panaglabsing iti Republic Act 7610 wenno Acts of Lasciviousness ken Republic Act 8353 wenno panangrames idiay Barangay San Roque, SRPC Compound, San Manuel, Pangasinan idi kalman.
Natiliw ti suspek babaen iti bileg ti warrant of arrest nga impaiyulog ti Regional Trial Court iti La Trinidad, Benguet.
Narekomendaran daytoy ti piyansa nga P80-K para iti panaglabsingna iti Republic Act 7610 wenno “Special Protection of Children Against Abuse, Exploitation, and Discrimination Act”; P24-K a piyansa para iti kaso nga Acts of Lasciviousness ken awan ti naipaay a piyansa para iti Rape case.
Imet dagiti maseknan nga otoridad ti suspek para iti umno a dokumentasyon ken disposisyon.
